Quién lleva estu?


Ismael Carmona García

So iju de valviensi i poblanchina, nietu de colonus quintanejus i poblanchinus provincius. Soi professol de Segundaria de Latín i Griegu.

Llevu dendi'l 2003 envestigandu el estremeñu i hiziendu trebajus relacionaus con esta lengua. Saqué en el 2007 la primel edición de la Ortografía del Extremeño, cuyus Corrigenda biché ai pocu. En el 2009 saqué la primel edición descritiva de la Morfología del Extremeño.

Comu tradutol, ei sacau angunus testus crássicus en estremeñu ena colecion omónima con autoris comu Petroniu, Cicerón o Séneca.

Ei dau chalras i coloquius en Mijadas (noviembri 2009, Noviembri de 2011), Val-de-la-Calçá (eneru 2010, noviembri 2011), en el Congreso de Lenguas Minoritarias de Villarrubias (hebreru 2011), en el I Encuentro del Extremeño y su Cultura en Botija (juñu 2011), en Serraílla (agostu 2011, 2012) ena IV i V Edición del Habla Serradillana, Montanchi (diziembri 2011) en las IX Jornadas del Cerdo Ibérico, Ovieu (marçu 2012) en la Xunta de Escritores Asturianos 2012, Caçris (marçu 2012) en el V Simposio de Estudios Clásicos, en El Piornal ena Primavera Cultural Piornalega (abril 2012), ena jorná de Iniciativas Agroecológicas, en Val-de-Rosas (El Carcavosu) i ena Semana Coltural de Ríu-Lobus (agostu 2012), en Guiju de Sta. Bárbara (mayu 2013) ena VII fiesta de Viriato, en Barbañu (juniu 2013) nel III Festival Romano Amnis Callis de Barbañu. Tamién colavoru ca sabau nel pograma Rincón extremeño de Radio Unión Catalunya enseñandu alos oyentis, en estremeñu, palabras i dichus dela nuestra idioma en el apartiju Voz de mi tierra que lleva Manuel Trinidad.

Ogañu soi el presienti del OSCEC (Órgano de Seguimiento y Coordinación del Extremeño y su Cultura), dendi'l qual queremus crial un movimientu associativu al reol la coltura i las lenguas autóctonas d'Estremaúra pa recuperal i suponel tolo que en estus últimus añus s'á perdíu enantis de sel demaseau tardi.

Soi coscienti de que la perda'l estremeñu supondrá el farrungamientu duna delas colunas la coltura, no estremeña namás, sino peninsulal, hiziendu un hochi endrentu del patrimoñu lingüísticu romanci nel que muchus arrepararán quantis que apareça. Escumbrandu esti pobrema, creu comenienti actual pa arrehuíl d'essa situación i que comu bien que preteneci al puebru, es por él por quien hagu tó esti trebaju.

No hay comentarios:

Publicar un comentario